عنها اتكلموا ... بقلم الشاعر / سيد عبد الغنى

عنها اتكلموا
========
ياصحاب
عندي فكرة 
تيجوا نتكلم عنها
قبل ماتهرب مني 
وتسافر 
مين عارف
يمكن حد يدق الباب 
وياخدها
ويهاجر
بس قبل مانتكلم 
نقف دقيقة حداد 
اصل ياسادة ياشعرا
خليل حاوي مات
لا ده اتقتل
لا ده انتحر
خليل حاوي
لما لقاهم علي اول الجبل جايين مات
وأما شافهم في الشوارع 
والميادين إتقتل
وأما وصلوا جوه البيوت
ودقوا ع البيبان
انتحر 
لماعرف ان القضية خلاص 
مفيش منها رجا
زرع رصاصة ف الدماغ 
ومات
وانتوا لسه قاعدين  تتكلموا 
عنها 
وفيها تتمعشقوا 
وفي الرداوي  تغنوها
وع القهاوي بيها تتشدقوا
وتحكوا عنها ف الصالونات
فاكرينها تيجي بالاغنيات
قلتوا لازم نتكلم عنها
قلت بلاش خلوها نايمة
اصلهم قالوا زمان 
ملعونٌ من أحيا الفتنة
فسيبونا منها
وخلونا ف حالنا
اصلها كلمة وكله بقى يقولها
وف كل حاجة حاشرينها
ف اي شعار لاي حاجة حاطينها
واللي عاشوا وماتوا عشانها
هربت منهم 
يبقى ح تيجي معاكم كده على طول 
من غير ماتبينوا كرامات 
باقولكم مات 
ياسادة ياشعرا  مات
ونفسي أسألكم سؤال
وزنه إيه بحر السكات
مستفعلن مستفعلن
مستفعلات
لما أكلتم مخنا بالتفعيلات
أقولكم 
اصلها مش بالكلام 
اصلها بنت عفية 
عاوزة الشجاع الهمام
اللي يقدر على مهرها
ويدفعوا بالسلام
ومن غير ملام 
على رأي صديق ليَّا هُمَام
ياسادة ياشعرا 
احسن لكم 
فضوا الكلام
بقلمي@سيدعبدالغني عبدالصمد
جمهورية مصرالعربية