لو كنت بحبك.... بقلم الشاعر : السيد محمد صابر

لوكنت بحبك
========
وكأنى بحبك
وأنا واقف
وأنا ماسك علمك بيرفرف
وف وسط ميدان
وكأنى بحبك
وأنا بهتف
فليسقط وليسقط (من باع ترابك)
وكل جبان
وكأنى بحبك
وأنا شايف
صورك ياجميلة بتتشوه
وبيظهر شعبك فى الصورة
عريان وجعان
وكأنى بحبك
وأنا خايف
وأنا عارف حقيقة خوفى وبتدارى
لخوفى يبان
وكأنى بحبك
وبخالف حبك
يابهية وأنا بايع شرفك بإيديا
وعامل إنسان
وكأنى بحبك
وأنا حالف
وأنا عايش عمرى وبخون
وخسيس وجبان
وكأنى بحبك
يابهية
وأنا بزرع الفرقة ف أهلى
وبصنف اشكال والوان
وكأنى بحبك
يابهية
لو كان الحب دى أشكاله
أزاى هتكونى ف يوم إنت
إزاى هنبنى ف يوم فيك ونعلى يا غالية
البنيان .......؟
لوكنت هاحبك يابهية
أو كنت بحبك بحقيقى ومش بس كلام
لازم حبك يترجم ويكون أفعال
علمك فى إيدينا وفوق راسنا
وهتافنا لروحنا وفى قلوبنا
هيصحى ضميرنا
يتبدل حال
نزرع ونصنع ونغنى
عشقك موال
وهيكتر خيرنا بين إيدنا
ويروق البال
نتجمع حواليك بفرحة
ونغزلك من شمسك طرحة
ونزوق توبك بالخضرة
وبعزم رجال
لوكنت بحبك
==========
السيد محمد صابر
2018/1/28