عمو الشتا... بقلم : جرجس انيس

عمو الشتا الله يخليك
ارحم اهالينا ابوس رجليك
لو ناوى تزود فى غباوتك
وحياة مامتى راح اولع فيك

انا ناسى ان انا ليا صوابع
علشان احساسى بيهم ضايع
وشفايفى لزقوا فى بعضيهم
وسنانى بتعزف فى روائع

والوش جليد صعب منشى
والعين ابدا ما بترمشى
وودانى الجوز شكل فريزر
جسمى عمود ما بيتحركشى

ولبست هدومى على الاخر
وعليا لحاف كده م الفاخر
ثابت فى مكانى ما بتحرك
بامانه مانيش قادر اتاخر

والحمام بقى عشرة و رفقه
احلى مكان موجود فى الشقه
ربنا يرحمنا من عنده
ويبص لنا بعين الشفقه

مانتاش وحدك كدهه يا حبيب
برد وناوى للكل يصيب
من كتر اللبس اللى علينا
شكلنا بقى يشبه للدواليب

فيا رب السما اسمع للندا
واقبل لايدين هنا متجمده
نطلب منك شمس تدفى
وكفايه البرد خلاص على كده

جرجس