ربنا يهديكى ...بقلم : محمد احمد حسن ( ابومهاود )

تعبتى قلبى وياكى
وهوا ياما اتمناكى
مش ممكن انا هفضل دايما
استعطف كدا واترجاكى
انا ماشى يا حيله وسايبك
تشكى من نار اشواقك
بطلت انا اضعف تانى
انا هامشى وسايبهالك
بتقول ابعد ما انا هبعد
خلاص انا خدت قرارى
من بكره يا حلوه هتيجى
تبكى وتقولى يا مرارى
عصفور وبايدى طلقته
علشان عشره ع الشجره
ولا طولتى واحد ولا عشره
حسيتى خلاص بالحسره
انا ماشى وخليكى فاكره
انتى اللى بهجر بديتى
لو جايه مطيعه وزاحفه
ودموعك ماليه عنيكى
هقعد مجعوص واتنك
ولا عمرى هسأل فيكى
اشربى م الكاس للآخر
كله عمايلك باديكى
هدعيلك يمكن تنسى
وكمان ربنا يهديكى
انا عارف نفسى ومتأكد
ان انا واد حلو وأمور
وانك يوم ما قابلتك كنتى
حل يا حلوه عليكى الدور
ومش محتاجه يا قطه نلف
على بعضنا كداهو وندور
ممكن تقوليلى مزودها
وانى بأفور او مغرور
لكن ثقتى فنفسى تمللى
بتخلينى اعدى السور
وانا واقف فى مكانى بخلى
كل الكون حواليا يدور
يبقى خلاص لايميها يا لولا
واقفى وخديلك دور
دا انا لما اعشق بتغندر
واتعايق زى المأمور
ممكن مره اميل وابقى
مستحمل حبه وصبور
واعى تفكرى انى عشانك
هبقى مليش لازمه وطرطور
لا يا حبيبتى.. ساعة الجد
بكون ممسوس زى المسحور.
وبصبح وبمسى عليكى
وابعتلك ف عنيكى نظره
واقولك..
انا مش مجبور

و اسم مصر التاريخ
يتغنى بحروفه
جاى معاه من بعيد
راسمه على كفوفه
كتب التاريخ قصته
عن مينا عن خوفو
عن قاهر الهكسوس
وطمعوا فيها لصوص
وقال لنا شوفوا
من يومها كانت بهيه
خضره منديه
مهما العدو يعمل
او صال فى تخريفه
ام الهرم والنيل
وماضى حلو جميل
منقوش على ضفافه
فنون وعلم وأدب
وجيشها حاميها
مهما عليها يمر
كايد اعاديها
المولى حارسها خضارها
وصاين اراضيها
--------------------------
ابومهاود
محمد احمد حسن