اسم القصيدة : كفر ظاظا
………………
كفر ظاظا ..
كفر عايش فى البلالا
كفر عايش فى اللى فات
تلقى واحد ابن هرمه
قال نهد الاهرامات
نمحى آثارنا القديمه
خوفو خفرع ولا مينا
ولا رمسيس اللى واقف
من سنين
اصلهم دول اصنامات
كفر ظاظا فيها ياما
ناس عسل ..
آخر قيامه
يجوزوا البنوته خضره
وهى طفله ولسه خضرا
وقولوا دى سنة نبينا
واللى جى بيبتلينا
يقوللى ارضاع الكبير
طب والصغير ..
قوللى راح ياكل منين
عقلى شت ياناس قولولى
اعمل ايه ..واروح لفين
هوا دا طب فهمونى
يبقى دين المسلمين
وبسلامته عقله ضاع
قالى حقك ..
لما مرتك ..
روحها تطلع ..
مره فى جماع الوداع
قال ياعينى الواد خلاصه
وكان الاجه ..
والغرام مقطع مهجته
يا وكسته ..
دا كان مقضيها مشاوره والسلام
وتمللى يهرب م المدام
كفر ظاظا ..
كفر شاطر فى الكلام
كله بيفتى فى الهوا
ولا فيش علام
ولا بمشى خطوه للامام
