مش مستاهلة... بقلم الشاعر : جرجس أنيس

مش مستاهله

مش مستاهله تزعل حد
صاحبك جارك حتى اخوك
دى الدنيا ما بتدومش لحد
واللى معاك ممكن يعادوك

مش مستاهله خناق فى البيت
ويا مراتك او مع اهلك
اوعى تكون جاز او كبريت
انت لوحدك بس هاتهلك

مش مستاهله تعمر راسك
شيشه سجاير بانجو حشيش
وفر مالك لاقرب ناسك
احفظ جسمك خليه يعيش

مش مستاهله تبص لواحده
ممكن تطلع اقرب ليك
بصه فى بصه هاتقلب شهوه
والشياطين ترقص حواليك

مش مستاهله تقطع نفسك
ليل ونهار على طول شغال
خليك وسطى واحفظ نفسك
الدنيا مش تجميع مال

مش مستاهله ومش مستاهله
دى الدنيا مجرد لحظات
خلى حياتك حلوه وسهله
تبعد عنك كل ضيقات

جرجس