سنين عجاف.. بقلم الشاعر : جرجس أنيس

والحقيقه الواضحه جدآ
واللى مافيهاش اختلاف
اننا بنعانى فعلآ
واننا فى سنين عجاف

احنا عايشين جوه دنيا
حسيناها حاجه تانيه
هم بيزيد كل ثانيه
والمرار حوالينا طاف

الفرح غمق فى لونه
والمرح عاشق سكونه
والفؤاد حاضن شجونه
دنيتى صابها الجفاف

الحياه بقيت مصالح
عشره اخاصم مره اصالح
والبشر مافيهمش صالح
والاثام راسمه العفاف

كله ماشى بالكلام
فهلوة وحقد وخصام
والضمير سافر ونام
والمبادئ فى اعتكاف

الزمن سن فى سنانه
زاد هياجه وزاد جنانه
كل شىء مابقاش مكانه
كله دوران والتفاف

نفسى ارجع بالزمان
للطيابه وللحنان
والمحبه والامان
لما كانوا الناس نضاف

بادعى لينا بالهدايه
نيجى على نقطة بدايه
نبتدى نرسم روايه
والجمال اخر المطاف

يا اله الكون يا نور
اقلب الاحزان سرور
والسواقى بخير تدور
بين ايديك انت الكفاف

جرجس