بحبك يامصر... بقلم : الشاعر / محمد احمد حسن

بحبك يا مصر
-----------------
حاول كدا تحبها
بنيلها وبشمسها
بخضارها وباهلها
بضحكتها ..
بنكتتها..
بسماها وبضلها
وقاعده على الكورنيش
ونسايم عطرها
بنظرتها..
وغمزتها..
وخفة دمها
بشاعر وقافيه
قفشه وأفيه
وقهوه بوش
وقلب صافى
مايعرفش غش
ضمنه وطاوله
وملك يكش
ولقمه بمش
ميه فى قله
شجره وضله
بلدنا دى فله
وعايقه تمللى
فى حرير وتوللى
جمالها مخلى
الناس يعشقوها
ولما يجوها
تزود غرامهم..
يخافوا يسبوها
ويجوا يلاقوها
زى ما هيه
شابه وصبيه
ومهما تعدى
عليها الاسيه
بتفضل بهيه
بسحر العصارى
وفى المغربيه
بحبك يا بلدى
وعاشق ترابك
نوبى وصعيدى
بحرى ورشيدى
زهرة شبابك
يحلوا المكان
ربابه وكمان
وافلام زمان
وجندى وميدان
بنصنع تاريخك
بحبك بحبك
بجيشك وشعبك
يا غاليه عليا
بحبك يا مصر
--------------------
ابومهاود
محمد احمد حسن